இன்று பிறந்த குழந்தைக்கு

உனக்காக வைத்திருந்த
முத்தத்தில்
ஃப்ளோரைட் வாசம்

உனக்காகப் பறித்த பூவில்
டீசல் தூசி

உனக்காக வாங்கிய
வாழ்த்து அட்டையில்
மரத்தின் இரத்தம்

எனது உலகத்திலிருந்து
ஏதுவுமில்லை உனக்கு

காற்றை
அழுக்குபடுத்தாமல் ஓடும்
உனது குட்டிக் கார்

வன்முறை அறியாத
இராணுவ வீரன்

சிரிக்கக் கற்றுக்கொடுக்கும்
சீனத் தங்கை

விபத்துகளைச் சந்திக்காத
விமானம்
ரயில்

மதங்களற்ற
உனது பொம்மைகளின்
உலகத்திலிருந்து
முடிந்தால் கொடு
எனக்கொரு சிரிப்பை.
-பழனிபாரதி

பிள்ளையார்
வேறுங்கல்லாய்க் கிடந்த சுதந்திரம்
வடிவம் பெற்றதில் சிதைந்துவிட்டதாய்
அவர் தனித்திருக்கும் மத்தியானங்களில்
அவருக்காக நான் யோசிப்பதுண்டு.
-பழனிபாரதி

காதலின் பின் கதவு / குமரன் பதிப்பகம் / ரூ.60