இன்று பிறந்த குழந்தைக்கு

உனக்காக வைத்திருந்த
முத்தத்தில்
ஃப்ளோரைட் வாசம்

உனக்காகப் பறித்த பூவில்
டீசல் தூசி

உனக்காக வாங்கிய
வாழ்த்து அட்டையில்
மரத்தின் இரத்தம்

எனது உலகத்திலிருந்து
ஏதுவுமில்லை உனக்கு

காற்றை
அழுக்குபடுத்தாமல் ஓடும்
உனது குட்டிக் கார்

வன்முறை அறியாத
இராணுவ வீரன்

சிரிக்கக் கற்றுக்கொடுக்கும்
சீனத் தங்கை

விபத்துகளைச் சந்திக்காத
விமானம்
ரயில்

மதங்களற்ற
உனது பொம்மைகளின்
உலகத்திலிருந்து
முடிந்தால் கொடு
எனக்கொரு சிரிப்பை.
-பழனிபாரதி

பிள்ளையார்
வேறுங்கல்லாய்க் கிடந்த சுதந்திரம்
வடிவம் பெற்றதில் சிதைந்துவிட்டதாய்
அவர் தனித்திருக்கும் மத்தியானங்களில்
அவருக்காக நான் யோசிப்பதுண்டு.
-பழனிபாரதி

காதலின் பின் கதவு / குமரன் பதிப்பகம் / ரூ.60

பழனிபாரதி கவிதைகள்

உறைந்த நதி

எத்தனைப் பெண்கள்

கோலம் போட்டாலென்ன

எந்தப் பெண்ணுக்கும்

உன்னடைய விரல்கள் இல்லை

எத்தனைப் பெண்கள்

என்னைப் பார்த்தாலென்ன

எந்தப் பெண்ணுக்கும்

உன்னடைய கண்கள் இல்லை

எந்த நிழலிலும்

உன் ஆறுதல் இல்லை

எந்த வாழ்த்திலும்

உன் குரல் இல்லை

உனது கோலத்தில்

மையம் கொள்ளப்

பூத்திருக்கிறது பூசணி

உன்னை எதிர்பார்த்துக் காத்திருக்கிறது

விலைபோகாமல்

ஒரு பானை

நீராட நீ வராமல்

உறைந்து நிற்கிறது

நம் ஊர் நதி

நீதான்

சொல்லிக்கொள்ளாமலேயே

புறப்பட்டுவிட்டாய்

உனது ஊரிலாவது

கரும்புகள் இனித்தால்

ஒரு கடிதம் எழுது.

-பழனிபாரதி